Post vonne Wolfsburger Waterwerke

Waterwerke
Waterwerke

Ass ik uten Fenster kieke , staht bi mien Naabarn drei Lüe rum. Mid orangenen striepigen Tüchs an. Sei maket en wichtigen Indruck un hett en Laptop inne Poten. Denne spräket sei unnernanner un tippet inne Tasten.

Vierteihn Dage späder gift et Post. As ik dä oppmake, ahnt mik nist Gu’et.

Et was en Breif vonne Waterwerke ut Wolfsburch : Verfügung xxxxx

Darin wütt sei wetten wat un wie use Water von Huuse bet anne Straate inne öffentlichen Kanäle löppt. Un oppe Dichte bist, dä Rohre meint sei. Vom Klo, vom Daake, vom Grundwater.           Datau hett sei mik DIN Vorschriften un Kamera’unnersäukung ewieset.

Un dat was nur de erste Siete, op Siete twei bet veier gift dat twintig verschiedene Paragraphen un noch mehr DIN Vorschriften wie en wat Bu’en un naawiesen mott.

Makeste dat nich, kannste fiefdusend Euro berappen.

Un Mehrkosten ward ook all annekündigt. Sei könnt dat Begrünnen: et gift tau veel Regen un Hochwater , sess mal sau veel wie se uute’reeket o’er annenoomen harrn dat nich inne richtigen Rohre löppt.

Minsche ik hebbe vorr fuffzig Jahren ebuut un da gaff et keine Kamera’unnersäukung un ook nich dä Vorschriften von hüüte. Bie mik is noch nie Water in Keller ewest, allet drööge.

Awer lijjet et villichte ook daran dat in miene Strate un im Niebuu’gebiet balle veierhunnert Wohnungen ebuut sünd?

Un inne Stadt? Sess or sebben niee Baugebiete, veier Innkööpcentren, Grootbäckerie, Gewerbegebiete, Immobilienfirma, Hotelkomplex usw.

Allet löppt tausamme in eine Affwateranlage.

Is de opp den nieesten Stand wi et hüüte nödich wäre?

Nu folget noch teihn DIN A4 Sieten Beleerungen wat en allet dokumentieren mott un sall.

Da moste studiert hebben. Twintig Begriffe wie Cloud, Timecode, Haltings-ID,QR-Codes forr dat Smartphone un wat nich allet soll en jebruuken un naawiesen.

Da warste blümerand in Koppe.

Awer sei seggt ook wenne dat nich verstahst kannste dik Rat halen da hülpet sei dik, oer most dik ein säuken un natürlich sülmst betahlen.

Un dä Buumaßnahmen natürlich ook, da biste ruckzuck einige dusend Euro los.

Sei wieset dick dropp henn, wenne wat inne Wege leitest moste dat genehmigen laaten un veier Weeken vor Beginn innrieken.

Düsset Schriewen hett sei inne ganze Stadt vadeilt wo keine Gullideckels tau seihn sünd.

Fräuher, wenn en wat wetten will, hett sei geklingelt un du konnst Antwort geben, ik meine sei verlanget minnestens twei Arbeitsdage sollste sei Bescheid seggen wenne wat ännern willst, un wenn sei mik esejjt härren wi wüllt mal innen Kanal kieken, sau könneste reagiern ( taun Biespeel da Steine inne Garageninfahrt ruutnehmen dat sei annen Deckel kieken könnt) .

Fuffzig Jahre wolle keiner dat. Un hüüte wirste mid saun Schriewstücke oberraschet, datte erstemal slaaplose Nächte hast.

Dä Tiedten hett sick e’ännert, ook de Umwelt. Veelet moste nie Bewerten, un dick anpassen, awer wennet annt Jeld geht is man doch nich glieks bereit–ja tau seggen.

Et gifft veele oole Bauten un oole Besitzer ( ik gahe ook oppe achtzig tau) dä jetzt düchtich inne Tasche griepen mött un dat nich ohne Murren hinnehmen wütt un Klage innrieket.

Ik hebbe mik mid miene Schrieweriee en betten Damp affelaaten un hoope op’n gu’et Enne.

Nich naalaten un beste Greute

Walter Kukawka  Plattdütscher Arbeitskreis

Zur Startseite